చింతయేయుం?

భావయామి గోపాలబాలం నేను చాలా చిన్నప్పుడు విన్న కీర్తనల్లో ఒకటి. అందుకేనేమో నాకు బాగా నచ్చిన, ఇష్టమైన పాటల్లో ఇదొకటి. చిన్నప్పుడు మా ఇంట్లో ఎల్.పి ప్లేయర్ ఉండేది. అది ప్లే చెయ్యటం ఒక సరదా అప్పట్లో. బినాకా గీత్ మాలా వి ఎన్ని రికార్డ్స్ ఉండేవో. అందులో అమీన్ సయాని గొంతు గంభీరంగా అసలెంత బావుండేదో. అప్పట్లో నాకు తెలీకుండానే ఆయన గొంతుని తెగ ప్రేమించేశాను. :) ఇంకా పాండవ వనవాసం, నర్తనశాల ..... (అసలు ఈ సినిమాల్లో పద్యాలు, పాటలు ఇంకా నాకు గుర్తున్నాయంటే అది ఎల్.పి ల మహిమే. ఆరు నించి పదేళ్ళ వయసులో ఏదైనా మనసుకి హత్తుకుంటే ఇంక వాటిని కావాలన్నా మర్చిపోలేమేమో. :) ). ఎం.ఎస్.సుబ్బులక్ష్మి గారి వెంకటేశ్వర సుప్రభాతం కూడా ఉండేది. అదే రికార్డ్‌లో రెండో వైపు స్వాతి తిరునాళ్ వారి కృతులుండేవి. భావయామి రఘురామం, శ్రీరంగపుర విహారా. ఈ రెండు కృతులు విని విని నోటికి వచ్చేసాయి కూడా. అందులో భావయామి రఘురామం రామాయణ రాగమాలిక. మొత్తం రామాయణం వస్తుంది సంస్కృతంలో. అద్భుతమైన కృతి. అలా భావయామి అంటే స్వాతి తిరునాళ్ కృతి తప్ప ఇంకోటి కాదు అని గాఠ్ఠిగా నమ్మే రోజులు. ఆ సమయంలోనే టివి లో ఒకసారి ఢిల్లి నించి వచ్చే ప్రోగ్రాంలో కూచిపూడి శాస్త్రీయనృత్యం వస్తుంటే అపురూపం కదా అని వి.సి.ఆర్‌లో రికార్డ్ చేశాం. అప్పట్లో వి.సి.ఆర్ మాకు ఒక్కళ్ళకే ఉండేది. అందరిళ్ళల్లోనూ వి.సి.పిలు ఉండేవి. నేను మా అన్నయ్య దర్జాగా అవసరం ఉన్నా లేకపోయినా ప్రోగ్రాంస్ రికార్డ్ చేసేవాళ్ళం. రామాయణం, మహాభారతంతో సహా. ఇప్పటికీ ఇండియాలో ఉండాలి ఆ కాసెట్స్. అలా రికార్డ్ చేసిన ప్రోగ్రాం ఒక శాస్త్రీయ నృత్యం. ఆ కళాకారిణి గుర్తులేదు కానీ ఆవిడ నృత్యం చేసిన పాట మటుకు బాగా గుర్తుంది. అదే అన్నమాచార్యుల కృతి భావయామి గోపాలబాలం. మొదటిసారి విన్నప్పుడు ఈవిడేంటి తప్పు పాడుతోంది భావయామి రఘురామం పాడాలి కదా అనుకుని మరి కాసేపు విని అబ్బే ఈవిడ తప్పే పాడుతోంది అని తీర్మానించేసుకుని ఎమ్మెస్ అంత ఆవిడే తప్పు పాడేస్తోంది నే కనిపెట్టేశాననుకుని గొప్పగా ఫీల్ అయిపోయి మా ఇంట్లో వాళ్ళకి చెప్పి అవి రెండు వేరు వేరు పాటలమ్మా అని చెప్పినా నమ్మక ఏవీ కాదు రెండూ ఒకటే అని తీర్మానించేసుకున్న రోజులు. తర్వాత్తరువాత విషయం అర్థమై భావయామి రెండు పాటల్నీ నేర్చుకున్నాను. :) ఒకటి రాముడి గురించైతే రెండోది కృష్ణుడి గురించి. రెండూ ఆయన పాటలే. రెండూ ఆయనని మనసులో నింపుకుని సేవిస్తే ఇంక ఆ మనసులో ఎటువంటి చింతలకీ తావు లేదని చెప్పే జీవిత సారాంశాలే.

భావయామి గోపాలబాలం .....

భావయామి గోపాలబాలం మనస్సేవితం తత్పదం చింతయేయుం సదా .....
భావయామి గోపాలబాలం మనస్సేవితం తత్పదం చింతయేయుం సదా .....

కటి ఘటిత మేఖలా ఖచితమణి ఖండికా .....
కటి ఘటిత మేఖలా ఖచితమణి ఖండికా పటల నినదేన విభ్రాజమానం
కుటిల పద ఘటిత సంకుల శింజితే నతం .....
కుటిల పద ఘటిత సంకుల శింజితే నతం చతుర నటనా సముజ్వల విలాసం .....

భావయామి గోపాలబాలం మనస్సేవితం తత్పదం చింతయేయుం సదా .....

నిరత కరకలిత నవనీతం .....
నిరత కరకలిత నవనీతం బ్రహ్మాది సుర నికర భావనా శోభిత పదం .....
తిరువేంకటాచలస్థితం .....
తిరువేంకటాచలస్థితం అనుపమం హరిం .....
తిరువేంకటాచలస్థితం అనుపమం హరిం పరమ పురుషం గోపాలబాలం .....

భావయామి గోపాలబాలం మనస్సేవితం తత్పదం చింతయేయుం సదా .....

అన్నమాచార్యుల వారి కృతి
రాగం : యమునాకళ్యాణి

ఇక్కడ వినండి

భక్తి ... ప్రేమ ... నింద ...

విక్రం హజ్రా పాడిన అచ్యుతం కేశవం నాకు బాగా నచ్చిన భజన. చిన్నప్పుడు నేర్చుకున్న అచ్యుతం కేశవం పాట వెతుకుతుంటే ఈభజన దొరికింది. వినగానే ఒక రకమైన అలౌకిక భావన కలిగింది. భగవంతుడు మనం పిలిస్తే పలకడు అనుకుంటాం కానీ ఆ మీరాలాగా పిలుస్తున్నామా? ఆ యశోదమ్మలాగా జోల పాడుతున్నామా? రుచికరమైన పళ్ళే తినాలి అని తను రుచి చూసి తియ్యటిపళ్ళని ఆ స్వామికి అర్పించిన భక్త శబరి భక్తి మనకుందా? భగవంతుడి చేత నాట్యం చేయించిన గోపికలకున్న ప్రేమ మనకుందా? అవి లేనప్పుడు ఆ దేవుడు పలకట్లేదని నిందించగలిగే అర్హత మనకుందా? ఏమో. :)

విక్రం హజ్రా ఈ భజన పాడిన తీరు నాకు బాగా నచ్చింది. మా యశోదా కే జైసే సులాతే నహీ అన్నప్పుడు మెల్లగా మృదువుగాపాడటం; నిజంగా స్వామివారిని నిద్రపుచ్చుతూ జోల పాడుతున్నట్టు ఆ వెంటనే అచ్యుతం కేశవం అందుకున్నప్పుడు గొంతులో నవ్వుచాలా బావుంటుంది.

అచ్యుతం కేశవం కృష్ణదామోదరం .....

అచ్యుతం కేశవం కృష్ణదామోదరం

రామనారాయణం జానకీవల్లభం .....

కౌన్ కెహతే హై భగవాన్ ఆతే నహీ

తుమ్ మీరా కే జైసే బులాతే నహీ .....

అచ్యుతం కేశవం కృష్ణదామోదరం

రామనారాయణం జానకీవల్లభం .....

కౌన్ కెహతే హై భగవాన్ ఖాతే నహీ

బైర్ శబరీ కే జైసే ఖిలాతే నహీ .....

అచ్యుతం కేశవం కృష్ణదామోదరం

రామనారాయణం జానకీవల్లభం .....

కౌన్ కెహతే హై భగవాన్ సోతే నహీ

మా యశోదా కె జైసే సులాతే నహీ .....

మా యశోదా కె జైసే సులాతే నహీ .....

అచ్యుతం కేశవం కృష్ణదామోదరం

రామనారాయణం జానకీవల్లభం .....

కౌన్ కెహతే హై భగవాన్ నాచ్‌తే నహీ

గోపియోంకీ తరహ్ తుమ్ నచాతే నహీ .....

అచ్యుతం కేశవం కృష్ణదామోదరం

రామనారాయణం జానకీవల్లభం .....
అచ్యుతం కేశవం కృష్ణదామోదరం

రామనారాయణం జానకీవల్లభం .....
రామనారాయణం జానకీవల్లభం .....

రామనారాయణం జానకీవల్లభం.

గానం : విక్రం హజ్రా.

ఇక్కడ వినండి.

ఇక్కడ కూడ వినచ్చు.

రాముడుద్భవించినాడు రఘుకులంబునా .....

రాముడుద్భవించినాడు రఘుకులంబునా .....
శ్రీరాముడుద్భవించినాడు రఘుకులంబునా .....
తామసులను దునిమి దివిజ సోమంబుల క్షేమముకై కోమలి కౌసల్యకు
శ్రీరాముడుద్భవించినాడు రఘుకులంబునా .....

తనరు చైత్ర శుధ్ధ నవమి పునర్వసందునా
సరస కర్కాటక లగ్నమరయగ సురవరులెల విని కురియింపగ విరుల వాన
రాముడుద్భవించినాడు రఘుకులంబునా .....

దశరధుండు భూసురులకు ధనమొసంగగా
విసరె మలయ మారుతములు దిశలెల్లను విశదములై వసుమతి దుర్భరము బాప
రాముడుద్భవించినాడు రఘుకులంబునా .....

ధరను కుడిమి లంక పురమును అరసి బ్రోవగా
కరుణతో శ్రీరంగదాసు మొరలిడగను కరుణుంచియు వరమివ్వగ స్థిరుడై

శ్రీరాముడుద్భవించినాడు రఘుకులంబునా .....
తామసులను దునిమి దివిజ సోమంబుల క్షేమముకై కోమలి కౌసల్యకు
శ్రీరాముడుద్భవించినాడు రఘుకులంబునా .....

ప్రయాగ రంగదాసు వారి కృతి

డాక్టర్ మంగళంపల్లి బాలమురళి గొంతులో

ఈ రోజు విశేషం (అంటే నిన్న) .....

హేమంత పౌర్ణమి. :) రాస్తున్నది ఈరోజైనా ఇంకా నడిరేయి కాబట్టి నిన్న అన్నట్టే కదా లెక్క. పుట్టినరోజంటే నా దృష్టిలో కొత్తసంవత్సరం అన్నట్టే. ఈ లెక్కన డిసెంబరు ముఫ్పై ఒకటిన హేమంత పౌర్ణమితో కొత్త సంవత్సరం మొదలైతే, వెనువెంటనే౨౦౧౦ సంవత్సరం కూడా మొదలైంది. ౨౦౧౦ నూతన సంవత్సరానికి ఇప్పుడే ఆర్భాటంగా ఆహ్వానం పలికి వచ్చాము. ఈ కొత్త సంవత్సర నిర్ణయాలు కొన్ని ఉన్నాయి. సాధారణంగా న్యూఇయర్ రిజల్యూషన్స్ బ్రేక్ చెయ్యటానికే అంటారు కానీ నేను కొన్ని నిర్ణయాలు తీసుకున్నాను. అవి బ్రేక్ చెయ్యకూడదన్నది ఇంకొక రిజల్యూషన్. ఇంక చూడాలి మరి. :)

పురుషాకృతివో స్త్రీవో ..... ఎవరివో నీవెవరివో .....

తిరుమల మందిర సుందరా పాట నాకు, మా అమ్మకి చాలా ఇష్టమైన భక్తి పాటల్లో ఒకటి. రాగం, భావం అత్యద్భుతంగా ఉంటాయి ఈ పాటలో.

ఆ మధ్య ఈ పాట MP3 దొరక్క గిలగిలలాడిన నాకు తన దగ్గర ఉందని చెప్పి వెంటనే పంపించిన నిషికి బోలెడు థాంక్స్ చెప్పుకోవాలి.

తిరు వీధుల మెరిసే దేవదేవుడు అని అన్నమయ్య పాడారేమో కానీ ఇలాంటి భక్తి పాటలు వినిపించే ప్రతి ఇంట్లో పలికించే ప్రతి హృదిలో ఆ దేవదేవుడు మెరుస్తూనే ఉంటాడు.

పాలకడలిలో పవళించిన ఆ లక్ష్మీవిభుడివో తెలీదు, వెండికొండపై నిత్యం ధ్యానంలో ఉండే అర్థనారీశ్వరుడివో తెలీదు, ముగురమ్మల మూలపుటమ్మవైన త్రిజగన్మాతవో తెలీదు కానీ కాంతులు చిందిస్తూ అందర్నీ ఆకర్షించే నీ ముఖబింబము ఒక్క ఘడియ చూసినా అదే ఈ జన్మకి చాలు (అనుకుంటాం కానీ ఆయన రూపం అయస్కాంతం కాదూ, అక్కడ ఉన్న వాలంటీర్స్ తోసెయ్యకపోతే గోవింద నామస్మరణ చేస్తూ ఆ దేవదేవుడి దర్శనం చేసేవారెవరైనా అక్కడినించి కదులుతారా ఘడియలు దాటినా?) నీ గుడి వాకిట దీపమై వెలుగుతూ ఒక్క రాత్రి మనగలిగినా ఆ సేవ చాలు స్వామీ నీ పాదపద్మాలపై పువ్వునై ఒక్క క్షణం నిలిచినా నా జన్మ ధన్యత కాంచును దేవదేవా.

ఈ పాట వినప్పుడల్లా మా తాతగారు రాసిన దేవదేవ మోక్షపథము తెల్పవేమిరా అన్న పాట గుర్తొస్తుంది. ఆ పాట కూడా నీవరివో తెలీదు, అఖరికి పురుషాకృతివో, స్త్రీవో కూడా తెలీదు అని వస్తుంది. భగవంతుడు వైష్ణవుడు అనీ, శైవుడు అనీ, హిందువనీ, ముస్లిం అనీ నానా విధాలుగా తిట్టుకుంటాం కొట్టుకుంటాం. కానీ ఆఖరికి ఆ భగవత్‌స్వరూపం స్త్రీ రూపమో, పురుష రూపమో తెలీదు, ఆ స్వరూపానికి ఒక రూపం ఉందో లేదో తెలీదు కానీ నేను గొప్ప నా దేవుడు గొప్ప అని జుట్టు జుట్టు పట్టుకోటానికి తయారైపోతాము.

మా అమ్మ చెప్పే మాట నాకెప్పుడు నచ్చుతుంది. ఒక ఆర్టిస్ట్ ని అందమైన అమ్మాయి బొమ్మ గీయమంటే తన దృష్టిలో అందమైన అమ్మాయి ఎలా ఉంటుందో ఊహించి గీస్తాడు. అదే బొమ్మ ఇంకొక కళాకారుడిని గీయమంటే అతనూ అలానే ఊహించి గీస్తాడు. ఈ రెండు బొమ్మలు రెండు కళ్ళు ముక్కు నోరు ఉండటం తప్ప ఇంకెందులోనూ కలవవు. చూడకుండా ఊహించి గీసిన బొమ్మకి, చూడకుండా మనం ఊహించి మదిలో నిల్పుకుని పూజించే దేవుడికి తేడా ఉందా? నీళ్ళు గ్లాసులో పోస్తే అదే ఆకారాన్ని సంతరించుకుంటాయి. అవే నీళ్ళు గిన్నెలో పోస్తే గిన్నె ఆకారంలోనే కనిపిస్తాయి. అంతమాత్రం చేత అవి రెండు వేరే వేరే నీళ్ళు అనగలమా? గ్లాస్‌లో మినరల్ వాటర్ , గిన్నెలో టాప్ వాటర్ అని ఎవరైనా వితండవాదం చేస్తే ఎవరేం చెయ్యలేరనుకోండి. అది వేరే విషయం.

భగవంతుడు నిరాకరస్వరూపుడు అంటారు. కానీ మనం ధ్యానం కోసం వీలుగా ఆ దేవుడికి రూపం సృష్టించుకున్నాం. ఆ రూపాన్నే పూజిస్తున్నాం. కానీ అదే ఆయన శాశ్వత రూపం అని కనిపించే ఆయన ఇంకొక రూపాన్ని తిట్టిపోస్తాం. ఏంటో. ఇలా మాట్లాడానని నన్ను నాస్తికురాలిననో, కమ్యూనిస్ట్ టైపు ఆస్తికురాలిననో అనుకోకండి. నన్ను అల్లహ్ ఓ అక్బర్ అనమన్నా అంటాను కానీ నా రాముడిని పల్లెత్తు మాట అన్నా ఊరుకోను. ఆ నాలిక చీరెయ్యటానికి కత్తి పక్కన పెట్టుకునే తిరుగుతాను. :P

తిరుమల మందిర సుందరా ..... సుమధుర కరుణాసాగరా .....

తిరుమల మందిర సుందరా .... సుమధుర కరుణాసాగరా .....
ఏ పేరున నిను పిలిచేనురా ..... ఏ రూపముగా కొలిచేనురా .....

తిరుమల మందిర సుందరా .... సుమధుర కరుణాసాగరా .....

పాలకడలిలో శేషశెయ్య పై పవళించిన శ్రీపతివో .....
వెండికొండపై నిండుమనముతో వెలిగే గౌరీపతివో .....
ముగురమ్మలకే మూలపుటమ్మగ భువిలో వెలసిన ఆదిశక్తివో .....

తిరుమల మందిర సుందరా ..... సుమధుర కరుణాసాగరా .....

కాంతులు చిందే నీ ముఖబింబము కాంచిన చాలును గడియైనా .....
కాంతులు చిందే నీ ముఖబింబము కాంచిన చాలును గడియైనా .....
నీ గుడి వాకిట దివ్వెను నేనై వెలిగిన చాలొక రేయైనా .....
నీ పదముల పై కుసుమము నేనై నిలచిన చాలును క్షణమైనా .....

తిరుమల మందిర సుందరా ..... సుమధుర కరుణాసాగరా .....
ఏ పేరున నిను పిలిచేనురా ..... ఏ రూపముగా కొలిచేనురా .....

తిరుమల మందిర సుందరా ..... సుమధుర కరుణాసాగరా .....

సినిమా : సినిమా పాట కాదు. ప్రైవేట్ పాట
సాహిత్యం : దాశరధి గారు
గానం : ఘంటసాల గారు

ఆడియో : http://www.chimatamusic.com/search.php?st=tirumala+mandira

అవీ ..... ఇవీ ..... అన్నీ .....

మళ్ళీ బోల్డు రోజుల తర్వాత.

ఈ మధ్య రోజూ జల్సా పాటలు వింటున్నాను. మొదట విన్నప్పుడు, ఈ దేవిశ్రీప్రసాద్ ఆ బొమ్మరిల్లులో బందీ అయిపోయాడా, ఇంక బైటికి రాడా అని సందేహం వచ్చింది. ఒకే రకంగా అనిపించాయి పాటలు. తినగ తినగ వేము తీయగనుండు లాగా వినగా వినగా ఇప్పుడు ఓ మూడు పాటలు బానే ఉన్నాయనిపిస్తోంది. ఒక పాట మటుకు మొన్నటి వరకు 'హాంటింగ్' టైప్స్ లో వెంటాడింది. ఒక సందేహం అన్నమాట ఆ పాటలో. హీ ఈజ్ సైమన్ సునామీ అని పాట. అమెరికావాళ్ళు ఉప్పెనలకి కూడా అందమైన ఆడవాళ్ళ పేర్లు పెడుతుంటే మనవాళ్ళేంటి మగపేరు అదీ ఎంగిలిపీచు పేరు పెట్టారు సునామీకి అని డౌట్. సరే మనవాళ్ళకి అదో పిచ్చి అని డిసైడ్ అయ్యాను. మొన్నెందుకో హెడ్ ఫోన్స్ పెట్టుకుని వింటుంటే అర్థం అయింది. హీ ఈజ్ ఎ హ్యూమన్ సునామీట. :O ఈజ్, ఎ, హ్యూమన్ కలిప్పారేసరికి నాకట్టా వినిపించింది. :( ఈస్ అని పలికాడు పైగా. ఆ కలపటం, పలకటం వెరసి అయోమయం.

ఇలాంటిదే ఆ మధ్య ఇంకోటి.

పోకిరి సినిమాలో పాట ఇది. పెన్ దొరకగానే రారా అని పాడుతోంది పాడినావిడ. ఎన్ని సార్లు విన్నా పెన్ దొరగ్గానే రావటం ఏంటో ఒక పట్టాన అర్థం కాలేదు. సరే, దర్శక నిర్మాతలు ఎప్పుడూ చెప్తూండే ' సిట్యుయేషనల్ ' సాంగ్ అంటే ఇదేనేమో, హీరోయిన్ పెన్ పారేసుకుని, వెతికి కనబడగానే రమ్మని హీరోకి చెప్తూ పాడుతోందేమో అని ఊహించేసుకున్నాను (మన సినిమాల్లో ఇలాంటి సెన్స్ లెస్ సీన్లు చాలా మామూలు కదా అందుకే అలా ఊహించే ధైర్యం చేశా). తర్వాత అర్థం అయింది. 'పెందరకడనే రారా' అని.

వినికిడిలోపమా? ఏమో :(((((

పోకిరి అంటే ఇంకో పాట గుర్తొస్తోంది. జగడమే ..... సమరమే ట." ఆ దేవుడె దిగివస్తున్నా, ఆకసమే దిగిపడుతున్నా,బిన్ లాడెన్ ఎదుటే నిలుచున్నా " (ఇవి బానే వినిపించాయి, డౌట్లేమీ లేవు. :P కానీ .....) అర్థం ఉందా ఈ లైన్‌కి? దేవుడు దిగి రావటం, బిన్ లాడెన్ ఎదురుగా నించోవటం రెండూ ఒకటేనా? దేవుడు కనిపించకుండా సృష్టిని నడిపిస్తాడు. ఈ లాడెను ఎక్కడో దాక్కుని కనిపించకుండా అమాయకుల చేత విధ్వంసాలు చేయిస్తుంటాడు. కనిపించకపోవడం అన్నదే ఇద్దరి మధ్య కామను. అంతమాత్రాన ఈ దయ్యాన్ని తీసుకెళ్ళి దేవుడి గాటన కట్టేస్తారా? ఇద్దరూ సమానులే అన్న అర్థం వచ్చేలా రాస్తారా? నాకైతే అస్సలు నచ్చలేదు ఈ ముక్క.